Bakıda sürücüləri çaşdıran yol nişanı

Paytaxtın Nəsimi rayonu ərazisində, Bakıxanov küçəsi ilə Ceyhun Hacıbəyli küçəsinin kəsişməsində əksər sürücü çətinlik çəkir.

Milli.Az "Xəzər Xəbər"ə istinadən bildirir ki, buna səbəb bəzi sürücülərin baş yol nişanını əsas gətirərək qayda pozmasıdır.

Ekspert isə bildirir ki, baş yol nişani işıqfor işləyərkən qüvvəsini itirir. Buna görə də Bakıxanovdan sola dönən sürücülər qarşıdan gələnlərə yol verməlidirlər.

Bakıda Abbasqulu ağa Bakıxanov küçəsi ilə Ceyhun Hacıbəyli küçəsinin kəsişməsində sürücülər çaş-baş qalır. Bakıxanov küçəsində yol hərəkəti iştirakçılarına üstünlük verən yol nişanı olsa da, Ceyhun Hacıbəyli küçəsinə dönən bəzi sürücüləri yol polisinin əməkdaşları cərimələyir. Səbəb sürücülərin sağdan gələn avtomobillərə yol verməməsidir.

Sürücülər isə onlara üstünlük verən yol nişanını əsas gətirərək qayda pozmadıqlarını deyirlər.

Ekspert Ərşad Hüseynov bildirir ki, Bakıxanov küçəsində baş yol nişanın olması sürücülərə heç də həmişə üstünlük vermir. Bu məsələ Yol Hərəkəti Haqqında Konvensiyanın 5-ci maddəsi ilə tənzimlənir.

Əgər, işıqfor müxtəlif səbəblərdən işləməsə, bu zaman sürücülər baş yol nişanının tələbinə əməl etməlidirlər.
Milli.Az